माझे जीवन माझा योगा
21 जून हा दिवस आंतरराष्ट्रीय योगा दिन म्हणून साजरा केला जातो.उद्देश हाच योगाचे महत्व प्रत्येकाला समजावे. आज आपण पाहतो एकविसाव्या शतकात वावरतांना प्रत्येकाचे आयुष्य अतिशय धावपळीचे झाले आहे. घड्याळाच्या काट्याप्रमाणे मनुष्य दिवसभर धावत असतो. उद्योग,व्यवसाय,नोकरी,शिक्षण,शेती अशा वेगवेगळ्या क्षेत्रात काम करत असतो.जीवनात प्रगती करण्यासाठी मनुष्य सतत धावत असतो.प्रगती,पैसा,प्रतिष्ठा या मागे धावताना स्वताकडे लक्ष देत नाही.आयुष्यात पैसा,प्रतिष्ठा एवढेच महत्त्वाचे नाही.त्याचबरोबर निरोगी आरोग्य सुद्धा महत्त्वाचे आहे.स्वतःचे आरोग्य चांगले असेल तर,इतर सर्व गोष्टी मनुष्य करू शकतो. अनेक जण स्वतःच्या आरोग्याकडे लक्ष देत नाही.शेवटी शरीराला एखाद्या रोगाने ग्रासले की,मात्र आयुष्यात कमावलेला पैसा खर्च करत राहतो.परंतु आरोग्य पहिल्यासारखे पुन्हा कधीच मिळत नाही.भगवंताने दिलेले सुंदर शरीर शेवटपर्यंत सुंदर व तरुन राहण्यासाठी नियमित योगा केला पाहिजे.दिवसभराच्या व्यस्त कामात आपण आपल्या शरीरासाठी दररोज किमान एक तास दिला पाहिजे.नियमित रोज सकाळी एक तास योगा केला पाहिजे.माणसाचे मन शेवटपर्यंत तरूण राहते. तसे शरीर सुद्धा निरोगी व तरुण राहण्यासाठी योगा करणे फार महत्त्वाचे आहे. आज आजारपणात मोठ्या मोठ्या हॉस्पिटलमध्ये निदानासाठी गेल्यानंतर डॉक्टर योग्य उपचार करतात.व सोबत नियमित व्यायाम,योगा करण्याचा सल्ला देतात.निरोगी आयुष्यासाठी योगाचे स्थान महत्वाचे आहे. एखादा आजार योग्य मेडीसिनने बरा होऊ शकतो.परंतु निरोगी आरोग्यासाठी नियमित योगा करणे आवश्यक आहे. स्वतःच्या आरोग्यासाठी स्वतः एक तासाचा वेळ दिला तर आयुष्यात हॉस्पिटलमध्ये अनेक तास घालवायची गरज पडणार नाही.आज देशात हजारो लोक सकाळीच योगा करतात. योगामुळे प्रसन्नता लाभते.दिवसभर करणारे काम प्रसन्नतेने, उत्साहाने पूर्ण होते.योग शरीराला निरोगी ठेवते.याबरोबरच उत्साह,प्रसन्नता,कार्यक्षमता वाढविण्यास सुद्धा मदत करते.आपले ह्रदय दिवसभर काम करते.त्याला प्रसन्न करण्यासाठी,त्याचा थकवा घालवण्यासाठी योगा करणे आवश्यक आहे.वेगवेगळ्या आजारावर योगाच्या माध्यमातून सहज विजय मिळवता येतो. कुठल्याही आजारावर रामबाण उपाय म्हणजे योगा होय.नियमित योगा करण्यासाठी सकाळची वेळ उत्तम आहे.आपण असाल त्याठिकाणी हवेशीर मोकळ्या जागेत योगा करू शकतो. लहान मुलापासून ते म्हाताऱ्या माणसापर्यंत योगा करू शकतात.ज्यांना जो आजार आहे ज्या शारीरिक व्याधी आहे त्याला अनुसरून योगा करता येतो.आज बाजारात योगासनाच्या संदर्भात पुस्तके उपलब्ध आहे.आपण पुस्तके, टीव्ही,मोबाईल, युट्यूब याद्वारे सहज योगासनांची माहिती मिळवू शकतो.योगासनाचे व्हिडिओ बघून योगा करू शकतो.योग हा आस्तिक समजला जातो.योगामुळे मन,विचार,भावना,शारीरिक हालचाली सकारात्मक, आस्तिक होतात.चांगले विचार,चांगले मन,चांगली भावना, चांगल्या कामास प्रवृत्त करत असतात.मनाची प्रसन्नता व चांगले विचार याचे उत्तम औषध म्हणजे योग होय.आज देशभर,जगभर लोक योगा करतात. शालेय वयापासूनच योगाचे महत्त्व मुलांमध्ये रुजवले जाते.उत्तम आरोग्य हेच खरे धन आहे.आरोग्य ठणठणीत असेल तर इतर सुखाचा उपभोग घेता येईल.जीवनात सुखाचा उपभोग घेण्यासाठी निरोगी शरीर असावे लागते.शरीर रोगी असेल तर कोणतेही सुख सहजासहजी घेता येत नाही.रोजच्या जीवनशैलीला बंधने येतात. खाणे-पिणे,फिरणे,नेयमीत गोळ्या औषधी, नियमीत दवाखाना या गोष्टी मागे लागतात.यासाठी नियमित प्रत्येकाने सकाळी एक तास योगा करावा.निरोगी मनुष्य निरोगी आयुष्य ही येणाऱ्या काळाची गरज आहे.आज माणसाचे आयुष्यमान कमी झाले.पूर्वी शंभर वर्षे जगणारी माणसं शेवटपर्यंत निरोगी,ठणठणीत राहायची.आजकाल मनुष्याचे आयुष्य फार कमी झाले.अगदी कमी वयात वेगवेगळे आजार माणसाला जडत आहे.याचे कारण म्हणजे शरीराला पुरेसा वेळ आपण देत नाही.शरीराची बाह्य काळजी घेत राहतो.परंतु अंतर्गत शरीराची काळजी घेतली जात नाही.त्याचबरोबर सकाळी उशिरा उठणे,रात्री उशिरा झोपणे, चटपटीत फास्ट फूड खाणे, व्यसनाधीनता इत्यादी कारणांनी आयुष्मान कमी करून टाकले आहे.आज माणसाने विज्ञानाच्या साह्याने अनेक शोध लावले. अनेक नवीन गोष्टीचा माणसाच्या जीवनात शिरकाव झाला.या नवीन आधुनिक तंत्रज्ञानाचा उपभोग घेण्यासाठी निरोगी आयुष्य मात्र दीर्घकाळ मिळत नाही.नवनवीन शोधाचे मागे धावताना स्वतःच्या शरीराकडे मात्र दुर्लक्ष होत आहे.21 जून आंतरराष्ट्रीय योग दिनाच्या निमित्ताने संकल्प करुया नियमीत एक तास योगा करूया.स्वतःची व संपूर्ण कुटुंबाची निरोगी आयुष्याची काळजी मिटवूया.योगाने सुंदर जीवन घडवुया.माझे जीवन माझा योगा हा निरोगी आयुष्याचा संकल्प मनी ठाम करुया.
✍✍✍✍✍
राजेंद्र प्रल्हाद शेळके
No comments:
Post a Comment